23ágúst

Skólamær

Þá er skólinn byrjaður. Ég mætti í minn fyrsta tíma í gær og líkaði bara ágætlega. Smá skrítinn kennari en það er í góðu lagi. Mér var hugsað til Maríu systu þegar hún fór að tala um að við værum allar svo þroskaðar í kvöldskólanum að það þyrfti ekki að fara vel yfir kynfræðslukaflann og vímuefnakaflann... og svo situr hún í dagskólanum með litlu börnunum að horfa á kynlífsfræðslumyndband.... hehe.. gift kona...
Annars verður þetta smá törn hjá okkur hérna núna fram að jólum og mjög sennilega eftir áramót líka. Ég er í skólanum í 5 tíma í einu á þriðjudögum... úff... og svo er ég auðvitað í vinnu og að reyna að hugsa um heimili. Siggi að vinna á Kleppi með sínum kvöldvöktum og aðra hverja helgi þar sem hann er líka að vinna á Vegó. Sjáum hvernig þetta á eftir að ganga... en ef það heyrist ekkert í mér þá er ég örugglega kominn á Reykjalund vegna stress.
Ég er semsagt að taka 12 einingar í kvöldskólanum í FB. Það er alveg slatti mikið miðað við að ég er að vinna og halda úti heimili í leiðinni. En mikið hlakkar mig til að byrja fyrir alvöru. Ég er að fara í bóklega og verklega hjúkrunarfræði og hlakka mikið til að vita hvað ég á að gera í verklegri... sprauta appelsínur eða hvað?
Tók eftir því í gær hvað ég er algerlega dottin úr skrif-og lesæfingu. Ég var ekki lengi í gær og þurfti bara að skrifa niður einhverjar 3 línur en ég fann til... þvílík brunatilfinning. Svo var ég að lesa námsáætlun og hún er ferlega einföld en ég var mjög lengi að fara yfir.
Jæja... ég þarf að fara að læra heima.... jibbíííí... hélt að ég myndi aldrei verða ánægð með að segja það hehehe..
Bæjó
23. ágúst 2007 klukkan 19:53
Sunna Dís Pétursdóttir
1 athugasemd
06ágúst

Aftur í gang

Jæja. Ég ætla að gera eina tilraun í viðbót til að halda úti þessari síðu. Ég get ekki lofað því að ég verði geggjað dugleg en ég reyni.
Sumarfríið okkar er nú nánast búið, bara einn dagur eftir og svo vinna. Get ekki sagt að mig hlakki til og nú er málið að byrja á fullu að leita að nýrri vinni svo græni liturinn festist ekki alveg við mig. Ég er alveg að mygla í vinnunni og mæli ekki með þessu starfi fyrir neinn. Ég ætla að sækja um í kvöldskóla og drífa mig í gang í þeim málum og vonast til að finna vinnu innan þess geira sem ég er að fara að stunda nám í. Verð að athuga það.
Annars er ég að fara að læra sjúkraliða núna. Tek stúdent í því og fer svo í hjúkrunarfræði í HÍ ef allt fer eins og ætlað er. Draumurinn er svo að verða ljósmóðir. Þannig að ég sé fram á alveg fullt fullt af árum í skóla sem er bara hið besta mál.
Svo var litla systa að gifta sig um daginn. Ójá... nú er það Frú Sæunn María Pétursdóttir hvorki meira né minna. Brúðkaupið var alveg yndislegt í alla staði og ofsalega gaman að sjá hvað litla sys var og er hamingjusöm. Fórum í smá heimsókn til þeirra um daginn og þar lá stafli af kössum með stellinu þeirra í. Þau vita greyin ekkert hvað þau eiga að gera við þetta. Ef þið eruð í vandræðum elskurnar þá er pláss hjá okkur Sigga í nýja skápnum... við erum að safna þessu líka Ullandi
Jæja þá er þetta fínt í bili.... ætli ég þurfi ekki að sofa líka...
Þar til næst.... tata
06. ágúst 2007 klukkan 00:22
Sunna Dís Pétursdóttir
Engin athugasemd
28nóvember

Arrg

Ég var búin að skrifa inn alveg rosalega stóra og fína færslu hérna og svo þegar hún átti að fara inn á síðuna ákvað netið að bregðast eitthvað og ritgerðin horfin. Ég nenni ekki í augnablikinu að skrifa hana aftur þannig að þetta verður að duga þangað til ég skrifa hana, kannski í kvöld.
Það er allt gott að frétta..... takk fyrir

28. nóvember 2006 klukkan 20:27
Sunna Dís Pétursdóttir
Engin athugasemd
10nóvember

Niðurstöður úr síðustu könnun

Hvað finnst ykkur um hvalveiðar Íslands?

Frábært ( 73% / 8 atkvæði )
Mér er alveg sama ( 18% / 2 atkvæði )
Er algerlega á móti ( 9% / 1 atkvæði )
Hef enga skoðun á þessu ( 0% / 0 atkvæði )
10. nóvember 2006 klukkan 05:32
Sunna Dís Pétursdóttir
Engin athugasemd
10nóvember

Pirringur

Dagur missti dagmömmuna sína alveg fyrirvaralaust. Fengum að vita það þegar við sóttum hann í gær (miðvikudag) að hann gæti ekki mætt aftur á morgun. Það kom upp smá vandamál sem ekki er hægt að segja frá.
Það þurfti því að redda nýrri dagmömmu fyrir kútinn og það er ekki eins auðvelt og margir virðast halda. Við erum bæði að vinna og kemur sér ekkert vel að hringja stuttu eftir vinnu og segjast ekki geta mætt daginn eftir og ekki víst hvenær maður geti komist aftur. Einnig er ekki gengið að því að fá dagmæður hérna í Grafarvoginum eða nágreni. Ég er með 2 hugsanleg pláss í boði og það er allt og sumt. Önnur þeirra byrjar ekki fyrr en kl. 8:30 og við byrjum að vinna kl. 8:00 og hin er ólétt og á að eiga í maí. Mjög hentugt.
Nú vildi maður óska þess að dagforeldrar yrðu færðir yfir á leikskólana. Að það væru ungbarnadeildir inn á öllum ef ekki flestum leikskólum til að anna þessari eftirspurn. Það er alveg svakaleg þensla í samfélaginu og mikið um barneignir. Samt virðist ekki sem svo að dagforeldrum fjölgi heldur akkúrat á hinn bóginn. Þeim fækkar. Allavega hérna í Grafarvogi. Hvernig í ósköpunum eiga þessar konur að anna allri þeirri eftirspurn sem er á plássum? Við erum að tala um það að sumar eru komnar með biðlista fyrir haustið 2007.
Ég vona svo innilega að ríkisstjórnin geri eitthvað í þessum málum og það fyrr en seinna. Biðlistar hjá bæði dagforeldrum og leikskólum eru allt of langir og eitthvað verður að gera í þeim málum. Það gengur allavega ekki fyrir okkur að vera bæði að vinna og Dagur heima. Aðeins of ungur til þess að byrja að vera einn heima. Væri til í að hann gæti borðað sjálfur og farið á klósettið áður en það gerist.

Svo svona út í ALLT annað, þá var hann Dagur að læra svolítið nýtt í nótt. Þegar ég kom inn í herbergi í gærkveldi til þess að fara að sofa þá var hann eitthvað að vesenast upp í rúminu sínu. Svo allt í einu var minn sestur upp alveg steinsofandi. Sat í smá stund og lagðist svo út af og kom sér vel fyrir. Í morgun hélt hann áfram að reyna að setjast upp og viti menn hann gat það. Hann lærði sem sagt að setjast í svefni. Magnaður drengur. Svo eru tönnslurnar alveg að fara að gægjast upp úr. Maður liggur við sér þær í gegn um holdið. Ohh hann verður svo krúttlegur með 2 tennur í neðri góm.
10. nóvember 2006 klukkan 05:29
Sunna Dís Pétursdóttir
1 athugasemd
31október

Íslenskir fjölmiðlar

Mér finnst alveg ótrúlegt hvað íslenskir fjölmiðlar þurfa alltaf að velta sér upp úr hlutum sem skipta ekki máli eða fjalla eeeeendalaust um eitthvað sem er allt í lagi að fjalla um í 1-3 skipti, ekki 10-20. Ég fékk alveg nóg í síðustu borgarstjórnar-kosningum eftir umfjöllunina þá. Fréttatíminn var ekki um annað. Ég er nú enginn fréttafíkill og horfi yfirleitt ekki á fréttir, en það var ekki hjá því komist að vera var við þetta. Nú eru það kosningar aftur, hvalveiðar og ég veit ekki hvað og hvað. Hlutir sem skipta kannski ekki neitt rosalega miklu máli eru alveg í brennidepli fréttatímans en ef eitthvað er sem skiptir máli þá fer ekki mikið fyrir því. Mér finnst það allavega ekki. Svo gera þeir sér mat úr þessu í nokkra daga. Ég veit ekki, við búum nú ekki á stóru landi en það bara hlýtur að vera gerast eitthvað meira en kosningar og hvalveiðar.
Ég sá eitthvað af fréttunum í gær (eða hinn) og þar var verið að fjalla um nýja sónarinn fyrir verðandi foreldra. Mér finnst hann persónulega óþarfur nema eitthvað sé þá að, þá er hægt að nota hann til að sjá virkilega inn í legið, en ef fólk vill fara í svona sónar er ekki hægt að stoppa það. Í fréttunum í dag var enn og aftur verið að fjalla um þetta með sömu myndum og samtölum. Í kastljósi var enn verið að ræða þetta. Er þetta ekki fullmikið. Þetta er ekki í fyrsta sinn sem svona er. Mér finnst bara óþarfi að vera að blása upp einhverjar fréttir bara til þess að fylla fréttatímann. Hleypið fólkinu sem vinnur að fréttum bara fyrr heim til fjölskyldunnar og fyllið upp dagskrána með einhverju öðru. Væri það ekki bara skemmtilegra.
31. október 2006 klukkan 05:27
Sunna Dís Pétursdóttir
2 athugasemdir
30október

Helgin, úttekt

Þá er helgin búin. Ég get ekki sagt að mér finnist það gaman. Við fjölskyldan komum heim í gærkveldi í þessu líka æðislega flotta veðri. Veðrið var alveg frábært í gær upp í sveit. Ég fékk að sofa til klukkan hálf eitt um hádegi. Ég á svo æðislega drengi. Svo fór Siggi að sveitalúðast eitthvað. Fannst ekkert smá gaman í sveitinni. Við fórum svo á laugardaginn til Sólveigar og Snædísar á Hellissandi. Kíktum í kaffi og fengum þessa líka ótrúlega góðu formköku. Ég hef varla smakkað betri köku... ég sé að ég þarf að fara að glugga í bækurnar sem mamma á Hlæjandi
Annars er litli stubburinn okkar orðinn veikur Gráta Ég var að koma frá lækninum og hann er kominn aftur á astma-pústið. Vona bara að þetta verði ekki neitt alvarlegt. Hann er nú samt alltaf svo hress og kátur, þrátt fyrir óþægindi í hálsi og fleira. Alvöru karlmenni eins og pabbi sinn.
Jæja... hef þetta ekki lengra í bili.
30. október 2006 klukkan 18:14
Sunna Dís Pétursdóttir
Engin athugasemd
29október

Velkomin

Jæja...
Þá ætla ég að gera heiðarlega tilraun til þess að blogga hérna og halda uppi bloggsíðu. Ég mun gera mitt allra besta til að klikka ekki á þessu.

Hvað á svo að segja. Jú ég er byrjuð að vinna aftur. Er að vinna hjá Olís Gullinbrú. Það er mjög fínt. Ég er ráðin sem kokkur þangað. Vildi ekki fara út úr Grafarvoginum því Dagur er svo lítill, nýbyrjaður hjá dagmömmu sem honum finnst ekkert gaman en er samt að lagast, þannig að það er ágætt að vera í svona næstum kallfæri. Heldur mér rólegri að vita að ef eitthvað kemur upp á þá er ég enga stund að rúlla til hans. Ég er að vinna frá 8-16 og er Dagur hjá dagmömmu frá 7:30 til 16:00/16:30. Þetta er langur vinnudagur fyrir okkur bæði en það er ekki annað hægt þar sem kerfið er ekkert allt of fjölskylduvænt hérna á Íslandi. Algert sjokk að þurfa að borga 42.000 til dagmömmu. Það finnst manni heldur mikið.

Ég hef nú ekki mikið annað að segja í augnablikinu þar sem ég er stödd upp í sumarbústað og er bara í afslöppun með fjölskyldunni. Ég reyni því að finna eitthvað sniðugt að segja þegar maður er kominn í stressið aftur í borginni.
29. október 2006 klukkan 02:30
Sunna Dís Pétursdóttir
1 athugasemd

Aðalvalmynd

Góðar síður

Auglýsing

Barnafjör

Leit

Leikur dagsins

Klukkan

Innskráningar kubbur

Teljari

  • Heimsóknir í dag: ...
  • Þennan mánuð: ...
  • Frá upphafi: ...